Heb 8 | BJR | STEP | Maasá maa-ufána ákiaqa maaqímminoo máridanoo. Maasá aanáiqikira úriqararafa innaarúna úriqararana Ánutufa máriqoo miná aaqá miná ásauku uqannái máridanoo.

Hebrews 8

Yísufa maasá aanáiqikirausaki úriqararafa máridanoo.

1 Maasá maa-ufána ákiaqa maaqímminoo máridanoo. Maasá aanáiqikira úriqararafa innaarúna úriqararana Ánutufa máriqoo miná aaqá miná ásauku uqannái máridanoo. 2 Mifá sía Mooseena aanna ráidanoo sía faiqí usakáqaa úqiqaana maaqakifau aináinidanoofau. Ánutufa usakáqoo maqana uqannakina aináinidanoo. Mi-maqánaki innaarúnai Ánutufa mári óosiranaki aanáiqikirausa úriqararana aináinirana máraidanoo.

3 Aiqáma aanaiqikira úriqararausa maqee maqee nárana aandáu̱ arusáida Ánutuna tatúfu ámidaqa. Mooseefa mi-ainainiránaki misá quqánau. Dóo maasá aanáiqikira úriqararafa Yísufa mifá faqa Ánutuna tatúfirana ámirafa máriannoo. 4 Yísufa maa-maqánasaa márinanoofau sía aanáiqikirafa máriqini. Maaqóo moómoo aanáiqikirausa aandáu̱ Ánutuna aandáu̱ tatúfida suqá ámidaqa. Mooseena sándufamau fídaqa miqídaqa. 5 Mi-aanaiqísa aináinirafa sía ánoona máridaqa fífau amanandá kái máridanoo. Innaarúnai mári ainaina fífau amanandá kái máridanoo. Mooseefa Sinai máqa maaqaki úqiqaana máaqa usakáraree qufanoo Ánutufa maaqí qímasee qímaminóo qinau. Qinée áaqanasaa uqafíqaunna maqana amana kái andeeqásee usakáa. 6 Indaarú máru aanaiqikirausa miqíqa márufanoo Ánutufa maqee Yísuna firaaqoó úriqarara aanaiqikira ainainiranaki quqánau. Ánutufa faqa faiqí faqa moodáanakikirafa Yísunaindi úriqararafa máridanoo, Mooseena moodáanakikira ufa sándufamau fíranasaa mundínoo márunara uréeqararafa máridanoo. Yísunaindi úriqarara qima afeekaikiranasaa mundínoo márunara úriqararafa máridanoo.

7 Indaarú moodáanakikirafa ánoonaikinanoofau Ánutufa sía moó mara quqáiqini. 8 Ánutufa Isaraee máqannaara maaqí qímasee ákaraki níqira ufa qinau.

Qinée karaambáiqa maaqí qídaqa, Dóo qúsasaa qinée fúka moodáanakikira ufa Isaraee máqannaa faqa Yudana áiku ásauku faqa qianáura.
9 Óoqai misá nikeekú nikaakú faqa moodáanaki kíra ufa quqáafannana. Sía miqífau ianáurau, moo kámmianaura.
Mi-aukuannái misá Isaraee máqanna nísauku qumáree Isipa máqasaaqari nífiqee fímariafanaqa misá qiní moodáanaki kíra ufara níkooqoofaqa qiní minní qísaqau. Minára misá qiní qímaqimufaqa qinée minníseeqa sía íriqiafana.
10 Dóo maqee óoqeenáa moodáanaki kíra ufa minnísee Isaraee máqanna faqa fúka moodáanaki kíra ufa maaqí qímasee quqáidaqa. Qiní fúka moodáanaki kíra ufa maaqímminoo máridanoo.
Qinée karaambáiqa qídaqa. Qinée qúsasaa qeeqá sándufa misá nitikúraki quqáanaura, quqáseeqa misá nímuqusasaa ákara rúmaqaanaqa sía aunúaqeera. Qinée misá Ánutusa márianaura misá qiní faiqi námu márifaranoo.
11 Sía moó fannoo narí aqoónnanara fuki faakí qíannoo. Sía moó fannoo narí aqoónnanara Ánutunara íriannee qíannoo. Misá aiqámausa úriqararausa faqa uréeqarausa faqa qiníara írifaranoo.
12 Qinée misá áaqainnanara nífauaanáura. Qinée misá numóora síammiríanaura aunúanaura.
13 Ánutufa mi-fuka moodaanaki kiránara qídanoo indaarúqaanara óoqeenáa fee qídanoo. Óoqeenaa ainaina minnísaifa dóo afauqáqeenoo qúsasaa taikáfuannoo.